Ամերիկացի բանաստեղծ(1935-1984), 1960-ականների կոնտրկուլտուայի ներկայացուցիչներից, նրա մասին Վիքիպեդիայում

Հայքու շտապօգնություն

Կանաչ պղպեղի մի կտոր

ընկավ

աղցանի փայտե ամանից.

հետո՞ ինչ:

Տղամարդ

Գլխարկը գլխին

նա մոտ հինգ դյույմ բարձր է

տաքսու մեքենայից:

Անակնկալ

Ես բարձրացնում եմ զուգարանկոնքի նստատեղը

այնպես` ասես թռչունի բույն լինի,

ու տեսնում եմ կատվի հետքեր

կոնքի ամբողջ եզրով:

Սան Ֆրանցիսկո

Այս բանաստեղծությունը գտնվել է թղթե տոպրակի վրա` Ռիչարդ Բրոտիգանից, Սան Ֆրանցիսկոյի մի լվացքատանը: Հեղինակն անհայտ է:

Նավակ

Օ գեղեցիկ էր

մարդագայլը

իր չար անտառում:

Մենք նրան

տարանք կառնավալ

ու նա սկսեց լացել,

երբ տեսավ

Սատանայի անիվը:

Էլեկտրիկ

կանաչ ու կարմիր արցունքներ

իջան

նրա մորթե այտերից:

Նա նման էր

նավակի

մութ

ջրի վրա:

Այո, ձկնային երաժշտությունը

Իշխան ձկան գույնի քամի է փչում

աչքերիս միջով, մատներիս միջով,

ու ես հիշում եմ, թե ինչպես էին իշխանները

թաքնվում դինոզավրերից,

երբ նրանք գալիս էին գետի մոտ` խմելու:

Իշխանները թաքնվում էին գետնանցքերում, ամրոցներում

ու մեքենաներում: Նրանք սպասում էին համբերատարորեն դինոզավրերի վերանալուն:

Հաբը կամ Սփրինգհիլ հանքի աղետը

Երբ դու խմում ես հաբդ,

հանքի աղետի է նման:

Ես մտածում եմ բոլոր մարդկանց մասին`

կորած քո մեջ:

Մենք կանգ էինք առնում կատարյալ օրերին

Մենք կանգ էինք առնում կատարյալ օրերին

ու դուրս էինք գալիս մեքենայից:

Քամին նայում էր նրա մազերին:

Բանն այսքան պարզ էր:

Ես թեքվեցի ինչ-որ բան ասելու…

Քիթս ծերանում է

Հա,

երկար ծույլ սեպտեմբերյան մի հայացք

հայելուն

ասում է, որ դա ճիշտ է:

Ես 31 եմ,

ու քիթս

ծերանում է:

Այն սկսվում է

կամրջակի տակից

½ դյույմ ներքեւ

ու հետո ծավալվում է պառավորեն

մի դյույմ ու մի քիչ էլ.

կանգ է առնում:

Բարեբախտաբար, քթիս

մնացած մասը համեմատաբար

երիտասարդ է:

Հետաքրքիր է, թե

աղջիկները կուզե՞ն ինձ

ծեր քթով:

Արդեն լսում եմ նրանց`

անսիրտ այդ քածերին:

«Սիմպո է,

բայց քիթը

ծեր է»:

Խնդրում եմ

Արդյոք մտածու՞մ ես իմ մասին

այնքան,

ինչքան ես եմ մտածում

քո մասին:

Հայտնագործություն

Հեշտոցի թերթիկները բացվում են,

ինչպես Քրիստափոր Կոլումբոսը

Կոշիկներն է հանում:

Կա՞ ավելի գեղեցիկ բան,

քան նավի կորաքիթը,

որ քսվում է մի նոր աշխարհի:

Երբեք չեմ արել սա ավելի քնքշորեն

Քո բերանի քաղցր հյութերը

նման են մեղրի մեջ լողացած ամրոցների:

Երբեք չեմ արել սա ավելի քնքշորեն:

Դու ամրոցների գալարներ ես դրել

առնանդամիս շուրջը ու պտտում ես դրանք`

ինչպես արեւի լույսը թռչնի թեւերին:

Տենդի հուշարձանը

Ես այգու միջով քայլեցի դեպի տենդի հուշարձանը:

Այն ապակյա քառակուսու մեջտեղում էր` շրջապատված

կարմիր ծաղիկներով ու շատրվաններով: Հուշարձանը

ուներ ծովաձիու ձեւ, իսկ ցուցատախտակն ասում էր`

մենք տենդից վառվեցինք ու մեռանք:

Ձմռան առաջին ձյունը

Օհ, սիրուն աղջիկ, դու բանտարկել ես

քեզ սխալ մարմնի մեջ: Ավել

քսան փութը կախված է, ինչպես գունդ-գունդ

ժանյակ, քո կատարյալ կաթնասունի մարմնից:

Երեք ամիս առաջ դու նման էիր

եղնիկի, որ նայում է ձմռան առաջին ձյանը:

Հիմա Աֆրոդիտեն քշտում է քիթը վրադ

ու պատմություններ է պատմում մեջքիդ ետեւում:

Սիրաբանող թուք

Մի աղջիկ կանաչ մինի

փեշով, ոչ այնքան սիրուն,

քայլում է փողոցով ներքեւ:

Սիրային բանաստեղծություն

Այնքան լավ է

արթնանալ առավոտյան

ամբողջովին մենակ

ու ստիպված չլինել ասել մեկին,

որ սիրում ես նրան, երբ չես սիրում

այլեւս:

Կալիֆորնիայի տեխնոլոգիական ինստիտուտ

Վեջս չէ, թե ինչքան խելոք են էս

անիծյալ գյադեքը. ես ձանձրանում եմ:

Ամբողջ օրը կատաղած անձրեւ է եկել,

ու ոչ մի անելիք չկա:

Կաֆկայի գլխարկը

Անձրեւի հետ, որ

վիրահատության նման թափվում էր տանիքին,

ես կերա մի աման պաղպաղակ,

որ նման էր Կաֆկայի գլխարկին:

Ես ապրում եմ քսաներորդ դարում

Ես ապրում եմ քսաներորդ դարում,

ու դու պառկած ես այստեղ կողքիս: Դու

երջանիկ չէիր, երբ քնեցիր:

Ոչինչ չկար, որ կարող էի անել

դրա հետ կապված: Անհույս էի: Քո դեմքն

այնքան գեղեցիկ է, որ չեմ կարող դադարել

նկարագրել այն, ու չկա մի բան,

որ կարող եմ անել՝ քեզ երջանիկ դարձնելու համար, քանի դեռ

քնած ես:

Ռոմեո եւ Ջուլիեթ

Եթե մեռնես ինձ համար,

ես էլ կմեռնեմ քեզ համար,

ու մեր գերեզմանաթմբերը նման կլինեն երկու սիրեկանների, որ լվանում են

իրենց շորերը միասին

նույն լվացքատանը:

Եթե դու բերես օճառը,

ես կբերեմ սպիտակեցնող հեղուկը:

Վախ, էնքան գեղեցիկ ես, որ սկսում է անձրեւել

Օհ, Մարսիա,

Ես ուզում եմ, որ քո երկար խարտյաշ գեղեցկությունը

դասավանդվի ավագ դպրոցում

այնպես, որ երեխաները սովորեն, որ աստված

ապրում է մաշկի մեջ երաժշտության պես

եւ հնչում է՝ ինչպես արեւալույս կլավիկորդ:

Ես ուզում եմ, որ ավագ դպրոցի զեկուցագրերը

լինեն այսպես.

Նուրբ ապակյա իրերի հետ խաղ

A

Համակարգչային մոգություն

A

Նամակներ սիրածդ մարդկանց

A

Ձկների մասին բացահայտումներ

A

Մարսիայի երկար խարտյաշ գեղեցկությունը

A+!

Show Comments Hide Comments

Leave a Reply

Your email address will not be published.